Kua whakatōpūngia ngētehi ringatoi ki Te Whare Hau Tutū ki te ako me pēwhea te tā i ngā momo kōwhaiwhai.
“Te nuinga o te wā ka aro pū rātou ki ngā kōrero e pā ana ki ērā tohu nā te iti o te wā, toru hāora noa iho ka piri mai rātou ki taku taha. With that in mind, ka tino aro ki ngā kōrero,” hei tā Jayden Hokianga.
Koinei te tau tuarua o ngā wānanga kōwhaiwhai o Te Whare Hau Tutū, ā, nā Jayden Hokianga (Ngāti Maniapoto, Ngāti Urunumia) te wānanga i whakahaere, hei whāngai i ōna pūkenga ki te hunga e hiakai ana ki te ako i ngā mahi toi.
“Ngā tāngata ka tae mai, ētahi he tauhou ki ngā mahi kōwhaiwhai, some are just here for a tutu. Te nuinga o te wā ka haramai ki te wānanga, ki te kōrero, whakawhiti kōrero, te nohotahi. He tino pai te wānanga ki a tātou te Māori,” hei tā Hokianga anō.
Ka ako ngā ringatoi me pēwhea te tā i ngā momo kōwhaiwhai pērā i te koru, te mangopare me te pūhoro, ā, ko te whāinga nui, kia rau atu ngā ringatoi i ngā pūkenga ki ō rātou ake kete me te hanga i ō rātou ake kōwhaiwhai.
“Karawhiua. Mehemea ka hiahia koe te whai i tēnei ara, tukua, whāia. Just have fun as well,” hei tā Hokianga anō.
Ko te āki nui a Hokianga, kia karawhiua ngā ringatoi i ō rātou whakaaro auaha, hei para i te huarahi mā rātou i roto i ngā mahi toi.